सिक्किम एडभेन्चर टुरिजम फेस्ट २०२६ अन्तर्गत आयोजित रिले एडभेन्चरको प्याराग्लाइडिङ गतिविधि आज सफलतापूर्वक सम्पन्न भएको छ। यस साहसिक गतिविधिमा १४ जना सहभागीले भाग लिएका थिए।
सहभागीहरूले पाक्योङ जिल्लाको अम्बास्थित निर्धारित प्याराग्लाइडिङ स्थलबाट उडान भरेर सिक्किमका मनोरम प्राकृतिक दृश्यहरूको अवलोकन गर्दै नाम्ची जिल्लाको रोराथाङमा सुरक्षित अवतरण गरेका थिए।
अवतरणपछि सहभागीहरूलाई नाम्ची जिल्लाको नामथाङस्थित लिङखिम तारमा रहेको मुख्य महोत्सव स्थलमा पुर्याइएको थियो। त्यहाँ उनीहरूले महोत्सवअन्तर्गत आयोजित विभिन्न साहसिक गतिविधिहरूको अनुभव लिएका थिए।
सिक्किम सरकारको पर्यटन तथा नागरिक उड्डयन विभागद्वारा आयोजित उक्त महोत्सव आज सम्पन्न भएको छ। महोत्सवमा हवाई, स्थल तथा जलमा आधारित विभिन्न साहसिक गतिविधिहरू प्रस्तुत गर्दै सिक्किमलाई प्रमुख साहसिक पर्यटन गन्तव्यका रूपमा प्रवर्द्धन गर्ने लक्ष्य राखिएको थियो।
