भोडाफोन आइडिया लिमिटेड (Vi) ले शुक्रबार केही निश्चित पोस्टपेड, प्रिपेड र इन्टरप्राइज योजनाहरूमा निःशुल्क अन्तर्राष्ट्रिय रोमिङको घोषणा गरेको छ, जसले गर्दा योग्य ग्राहकहरू विदेश यात्रा गर्दा १७० भन्दा बढी देशहरूमा सम्पर्कमा रहन सक्नेछन्।
दूरसञ्चार सेवा प्रदायकले आफ्नो “भी मा सबैजना भीआईपी हुन्” ब्रान्डको प्रतिबद्धताअन्तर्गत ल्याइएको यो नयाँ सुविधाले ग्राहकहरूलाई अन्तर्राष्ट्रिय रोमिङमा वार्षिक ९,००० रुपैयाँसम्म बचत गर्न मद्दत पुर्याउन सक्ने बताएको छ। योजनाका आधारमा प्रयोगकर्ताहरुले वार्षिक तीन पटकसम्म नि:शुक्ल रोमिङ सुविधा प्राप्त गर्न सक्छन्, जसमा अन्तर्राष्ट्रिय डेटा कोटा र आउटगोइङ मिनेटहरू योजनाअनुसार फरक-फरक हुन्छन्।
यस कदमको उद्देश्य ग्राहकहरुलाई छुट्टै रोमिङ प्याक, स्थानीय सिम वा ट्राभल ई-सिम खरिद गर्नुपर्ने आवश्यकता हटाएर विदेशमा सम्पर्क सुविधालाई सहज बनाउनु हो। भीले जनाएअनुसार, यस सेवाले यात्रुहरूलाई विदेशमा रहँदा पनि आफ्नै भारतीय मोबाइल नम्बर कायम राख्न र ओटीपी जस्ता सेवाहरू प्राप्त गर्न सक्षम बनाउँछ।
यसका लागि योग्य पोस्टपेड योजनाहरू ५०१ रुपैयाँबाट सुरु हुन्छन् भने यो सुविधा वार्षिक प्रिपेड अनलिमिटेड डेटा योजना तथा कर्पोरेट ग्राहकहरूका लागि ४५१ रुपैयाँबाट सुरु हुने कर्पोरेट योजनाहरूमा पनि उपलब्ध छ। भी एप मार्फत ‘इन्टरनेसनल रोम-फ्री’ योजनाहरू छनोट गरेर यसलाई सक्रिय गर्न सकिन्छ।
भीका प्रमुख मार्केटिङ अधिकृत अवनीश खोसलाले कम्पनीले अन्तर्राष्ट्रिय रोमिङलाई अतिरिक्त खरिदको सुविधाबाट परिवर्तन गरी आफ्ना मुख्य योजनाहरूमा समावेश हुने (बिल्ट-इन) सुविधाका रूपमा उपलब्ध गराउन लागेको बताएका छन्।
अभिनेता शाहरुख खान समावेश भएको एउटा नयाँ विज्ञापनमार्फत यस प्रस्तावको प्रचार गरिँदै छ।
