सहिद मेजर दुर्गा मल्लको ८३औँ पुण्यतिथिको अवसरमा आज भारतीय गोर्खा प्रजातान्त्रिक संगठन (भागोप) कालेबुङद्वारा श्रद्धाञ्जली कार्यक्रम आयोजना गरिएको छ। कालेबुङ शहरस्थित त्रिकोण पार्कमा रहेको सहिद मेजर दुर्गा मल्लको सालिगमा पुष्पगुच्छा अर्पण गर्दै उहाँप्रति श्रद्धाञ्जली अर्पण गरिएको थियो। कार्यक्रममा भारतीय भूतपूर्व सैनिक, बीएसएफका भूतपूर्व सैनिकहरू तथा भागोपका पदाधिकारी एवं सदस्यहरूको उल्लेखनीय उपस्थिति रहेको थियो। कार्यक्रमका मुख्य अतिथिका रूपमा भागोपका पूर्व राष्ट्रिय अध्यक्ष मुनिष तामाङ उपस्थित थिए। कार्यक्रममा सहभागीहरूले सहिद मेजर दुर्गा मल्लले भारतीय स्वतन्त्रता संग्राममा पुर्याएको योगदानलाई स्मरण गर्दै उहाँको बलिदानप्रति उच्च सम्मान व्यक्त गरेका थिए।
