रंगलीअट खण्ड समितिले क्षेत्रका जनतासँग प्रत्यक्ष सरोकार राख्ने विभिन्न सरकारी योजना तथा विकास परियोजनाको कार्यान्वयन, प्रगति र लाभग्राहीसम्बन्धी आवश्यक जानकारी उपलब्ध गराउन माग गर्दै रंगली–रंगलीअट खण्ड विकास कार्यालयमा ज्ञापनपत्र बुझाएको छ।
खण्ड समितिले खण्ड विकास अधिकारीसमक्ष बुझाएको ज्ञापनपत्रमार्फत खण्ड विकास कार्यालयको माध्यमबाट सञ्चालन तथा कार्यान्वयन भइरहेका विभिन्न सरकारी योजना र विकास परियोजनाको वर्तमान अवस्था, लाभग्राहीको विवरण तथा कार्यप्रगतिबारे स्पष्ट र आवश्यक जानकारी सार्वजनिक गर्न माग गरेको हो।
ज्ञापनपत्रमा विशेषगरी प्रधानमन्त्री आवास योजना अन्तर्गत सञ्चालन भइरहेका काम, स्वीकृत योजना तथा लाभग्राहीसम्बन्धी विवरण उपलब्ध गराउन आग्रह गरिएको छ। यसका साथै सोह्रौँ वित्त आयोगअन्तर्गत प्राप्त तथा विनियोजित रकम, त्यसबाट सञ्चालन भइरहेका विकास कार्य र योजनासम्बन्धी विवरण समेत उपलब्ध गराउन माग गरिएको छ।
त्यसैगरी, विशेष गहन पुनरावलोकन (एस.आई.आर.) सम्बन्धी आवश्यक जानकारी तथा यससँग सम्बन्धित प्रक्रियाबारे स्पष्टता प्रदान गर्न पनि खण्ड समितिले आग्रह गरेको छ। भीबी–जी राम जी परियोजना अन्तर्गत सञ्चालन तथा प्रस्तावित योजनाहरू, कार्यान्वयनको अवस्था र त्यससँग सम्बन्धित विवरणसमेत उपलब्ध गराउन माग गरिएको छ।
प्राकृतिक विपद्का कारण क्षेत्रका विभिन्न परिवार तथा व्यक्तिहरूले भोग्नुपरेको क्षतिसँग सम्बन्धित विषयलाई समेत ज्ञापनपत्रमा प्राथमिकताका साथ उठाइएको छ। विपद्का कारण क्षति पुगेका परिवार तथा प्रभावित व्यक्तिहरूलाई राज्यका तर्फबाट प्रदान गरिने क्षतिपूर्ति तथा राहतसम्बन्धी विवरण, लाभग्राहीको अवस्था र वितरण प्रक्रियाबारे आवश्यक जानकारी उपलब्ध गराउन समितिले माग गरेको छ।
यसैगरी, चिया बगान तथा सम्बन्धित क्षेत्रमा लागू हुने व्यापारिक अनुमतिपत्र (ट्रेड लाइसेन्स) सम्बन्धी विषयमा समेत आवश्यक जानकारी र स्पष्टता उपलब्ध गराउनुपर्ने माग ज्ञापनपत्रमा उल्लेख गरिएको छ।
गोरामुमो रंगली–रंगलीअट खण्ड समितिले सरकारी विकास योजनाहरू जनताको हितमा प्रभावकारी, व्यवस्थित र पारदर्शी ढङ्गले कार्यान्वयन हुनुपर्नेमा जोड दिएको छ। सरकारी योजनाका लागि विनियोजित स्रोत तथा सुविधा वास्तविक लाभग्राहीसम्म निष्पक्ष रूपमा पुग्नुपर्ने र विकास निर्माणका प्रत्येक कार्यमा पारदर्शिता तथा जवाफदेहिता कायम हुनुपर्ने समितिको धारणा रहेको छ।
खण्ड समितिले सम्बन्धित सरकारी कार्यालयबाट उठाइएका विषयहरूमा आवश्यक जानकारी तथा सहयोग उपलब्ध गराई जनताको सरोकारसँग प्रत्यक्ष जोडिएका विकास योजनाहरूलाई प्रभावकारी रूपमा अघि बढाउन आग्रह गरेको छ।
आजको प्रतिनिधि टोलीमा ब्लक कमिटीका उपाध्यक्ष गोपाल तामाङ, अल्बर्ट तामाङ श्याम थापा , सि के लोप्चन , डि के सुब्बा छिरिङ लामा , तेन्जिङ भुटिया , प्रवेश राई अनि दिनेस देवान उपस्थित रहेको प्रमित राईले जानकारी दिएका छन् ।
