उबरले गान्तोकसहित भारतका थप १०० सहरमा आफ्नो सेवा विस्तार गरेको छ, जससँगै देशमा यसको कुल उपस्थिति २२५ सहरमा पुगेको छ।
१८ वटा राज्य र एउटा केन्द्र शासित प्रदेशमा गरिने यो विस्तार मुख्यतया ‘उबर बाइक’ मार्फत सञ्चालन हुनेछ र यसको उद्देश्य साना सहरहरूमा किफायती आवतजावत तथा ‘फर्स्ट-एन्ड-लास्ट-माइल’ कनेक्टिभिटीलाई सुदृढ पार्नु हो। कम्पनीले जनाएअनुसार, यस विस्तारले हजारौं स्थानीय चालकहरूका लागि लचिलो किसिमले आम्दानी गर्ने अवसरहरू पनि सिर्जना गर्नेछ।
गान्तोकमा, उबर बाइकले यात्रुहरूलाई छोटो दूरीको र दैनिक यात्राका लागि, विशेष गरी यातायातको भिडभाड छल्न र सार्वजनिक यातायातका अन्य साधनहरूसँग जोडिनका लागि अतिरिक्त विकल्प प्रदान गर्नेछ।
गान्तोकमा उबरको प्रवेशले सहरको विकसित हुँदै गरेको यातायात प्रणालीमा नयाँ आयाम थप्न सक्छ, जसले स्थानीय बासिन्दा, विद्यार्थी र पर्यटकहरूलाई एप-आधारित यातायातका विकल्पहरू उपलब्ध गराउनेछ। यस सेवाले सहरको पर्यटनमा आधारित यात्राको माग र दैनिक आवतजावतको आवश्यकतालाई सम्बोधन गर्नुका साथै स्थानीय दुई-पहिया सवारी साधनका मालिकहरूका लागि आम्दानीको अवसर पनि सिर्जना गर्न सक्छ।
केन्द्रीय सडक यातायात तथा राजमार्ग मन्त्री नितिन गडकरीले यस विस्तारको स्वागत गर्दै सडक सम्पर्कमा सुधार र आवागमनका नयाँ उपायहरूले साना सहरहरूमा आर्थिक तथा जीविकोपार्जनका अवसरहरू सिर्जना गर्न सक्ने बताए।
उबर इन्डिया तथा दक्षिण एसियाका उपभोक्ता तथा विकास डायरेक्टरऋशान्त घोषले यो विस्तारले प्रमुख सहरी क्षेत्रभन्दा बाहिर पनि सहज र किफायती यातायात सेवाको बढ्दो मागलाई प्रतिविम्बित गरेको बताए।
कम्पनीले जनाएअनुसार, तोकिएका नियम तथा सर्तहरूको अधीनमा रही देशभरका नयाँ यात्रुहरूलाई सीमित अवधिका लागि पहिलो उबर राइड निःशुल्क उपलब्ध गराइनेछ। उबर बाइकको यात्रामा ‘रियल-टाइम ड्राइभर आईडी चेक’, एसओएस सहायता र ‘ट्रिप-सेयरिङ’ विकल्पजस्ता एप-आधारित सुरक्षा सुविधाहरू पनि समावेश हुनेछन्।
