जनगणना २०२७ अन्तर्गत स्व-गणना (Self-Enumeration) प्रक्रियाप्रति जनचेतना फैलाउने उद्देश्यले शुक्रबार सिलीगुडी उपविभागीय अधिकारी (SDO) कार्यालय परिसरबाट विशेष प्रचार रथ (ट्याब्लो) को औपचारिक उद्घाटन गरिएको छ। दार्जिलिङका जिल्ला अधिकारी (DM) ले हरियो झण्डा देखाएर उक्त प्रचार रथलाई शुभारम्भ गरेका हुन्।
आगामी १ अगस्ट देखि आधिकारिक सरकारी पोर्टलमार्फत सर्वसाधारणले आफैं आफ्नो जनगणनासम्बन्धी विवरण अनलाइन दर्ता (Self-Enumeration) गर्न सक्नेछन्। यसैलाई ध्यानमा राख्दै नागरिकहरूलाई स्व-गणना प्रक्रियाबारे जानकारी गराउने तथा डिजिटल पोर्टलमार्फत यस अभियानमा सहभागी हुन प्रेरित गर्ने उद्देश्यले यो जनचेतनामूलक अभियान सञ्चालन गरिएको हो।
दार्जिलिङ जिल्ला प्रशासनका अनुसार, नागरिकहरूको सक्रिय सहभागिताबाट मात्र जनगणना २०२७ लाई सफलतापूर्वक सम्पन्न गर्न सकिनेछ। यस व्यापक प्रचार अभियानमार्फत बढीभन्दा बढी नागरिक स्व-गणना प्रक्रियाबारे सचेत भई तोकिएको समयसीमाभित्र सरकारी पोर्टलमा आफ्नो तथा आफ्नो परिवारको विवरण दर्ता गर्ने विश्वास प्रशासनले व्यक्त गरेको छ।
