जाड़ो पर्न साथ अलिपुरद्वारमा पर्यटकहरूको उल्लेखनीय भीड़ देखिन थालेको छ। बक्सा टाइगर रिजर्भमा पर्यटकहरूको आगमन आरम्भ भएको छ। जङ्गलको रोमाञ्च अनुभव गर्न बिहानैदेखि पर्यटकहरू लामो लाइनमा उभिन बाध्य बनेका छन्। बक्सा टाइगर रिजर्भअन्तर्गत पर्ने राजाभातखावा टिकट काउण्टरमा पर्यटकहरूको लामो लाइन देखिएको छ।
धेरैजसो पर्यटकहरू कलकत्ता तथा दक्षिण बङ्गालका विभिन्न क्षेत्रबाट बक्साको प्राकृतिक सौन्दर्य अवलोकन गर्न आएका छन्। प्राप्त जानकारीअनुसार पर्यटकहरू जयन्ती पहाड़देखि लिएर जङ्गल सफारीसम्म समेटिएको बक्साको सम्पूर्ण रोमाञ्चक अनुभव लिन इच्छुक छन्। एकान्त पहाड़को काखमा रहेको जयन्तीमा रात बिताउँदै प्रकृतिको निःशब्द सौन्दर्य तथा शुद्ध वातावरणको आनन्द लिनु नै पर्यटकहरूको मुख्य आकर्षण बनेको छ।
प्रत्येक वर्ष जाड़ो याममा बक्सा टाइगर रिजर्भ पर्यटकहरूका लागि प्रमुख रोजाइको गन्तव्य बन्दै आउँछ। यसकारण यो समय पर्यटकहरूको भीड़ बढ़ेपछि पर्यटन व्यवसायीहरू खुशी देखिएका छन्। होटल, गाइड तथा स्थानीय यातायातसित आबद्ध व्यक्तिहरूले चालू मौसममा पर्यटन चहलपहलका कारण आफ्ना व्यवसायमा नयाँ गति आउने आशा व्यक्त गरेका छन्।
