हलिउड फिल्म ‘स्पाइडरम्यान : नो वे होम’ले तीन सातामा नेपाली बक्सअफिसमा झन्डै ६ करोड ९० लाख ग्रस कमाइ गरेको छ । महामारीयता कुनैपनि फिल्मले नेपाली बक्सअफिसमा गरेको यो सर्वाधिक कमाइ हो । एप्पल इन्टरटेनमेन्टका अनुसार यो सप्ताहन्तमा फिल्मको कूल कमाइ ७ करोड ग्रस पुग्न सक्छ । टम हल्यान्ड स्टारर फिल्मले सुरुआती दुई सातामा उछाल कमाइ गरेको थियो । कोरोना महामारीले थलिएको नेपाली फिल्म बक्सअफिसलाई स्पाइडरम्यानले चलायमान बनाइदिएको थियो ।
क्यूएफएक्ससहित मुलुकका प्रमुख सहरका मल्टिप्लेक्समा थ्रीडी प्रविधिमा रिलिज भएको फिल्मलाई दोहो¥याएर हेर्ने दर्शक बढेका छन् । दक्षिण भारतीय फिल्म पुष्पाले पनि नेपाली बक्सअफिसमा आक्रामक कमाइ गरेको छ ।
स्पाइडरम्यान र पुष्पाले अझै केही साता नेपाली हलहरुमा निरन्तरता पाउने देखिन्छ । कोरोनाको तेस्रो लहरले अनिश्चय बढाएको र नयाँ फिल्म रिलिज हुने सम्भावना नभएकाले पुरानै फिल्मले निरन्तरता पाउने बलियो सम्भावना छ ।
यस्तोमा, स्पाइडरम्यानको कमाइ सात करोड ग्रसभन्दा माथि जानसक्छ । यो फिल्म सोनीको सर्वाधिक कमाइ गर्ने मात्र नभएर सर्वाधिक कमाउने एप्पल इन्टरटेनमेन्टको पहिलो फिल्म पनि बनेको छ ।
