घना कुहिरोका कारण मालबजारमा वाहन दुर्घटना भएको छ। बुधवार मध्य राति मालबजार शहरको आदर्श विद्याभवनअघि यो दुर्घटना भएको हो। प्राप्त जानकारीअनुसार घना कुहिरोको कारण गोरुबथानदेखि चाल्सातर्फ गइरहेको सानो यात्रीवाहक वाहन सड़क किनारमा खड़ा गरिएको डम्परसित ठोक्किन पुग्यो। ठक्कर लगत्तै उक्त वाहन सड़कमा पल्टियो।
घटनामा वाहनभित्र रहेका पाँचजना यात्री गम्भीर रूपले घाइते भए। घाइतेमध्ये एक बच्चा पनि सामेल छ। घाइतेहरूलाई तुरुन्त उद्धार गरी शुरुमा माल सुपर स्पेशियालिटी अस्पताल लगियो। अवस्था गम्भीर रहेको कारण केहीबेरको निगरानीपछि साङ्गे लामा(5), बलम गुरुङ(47) र रामबहादुर गुरुङ (55) लाई उत्तर बङ्गाल मेडिकल कलेजमा रेफर गरिएको छ। पुलिसले यसैबीच वाहनलाई जफत गरिसकेको छ।
