विश्व हिन्दू परिषदले आह्वान गरेको 24 घण्टाको बन्दले सिलगढ़ीमा व्यापक प्रभाव पारेको छ। बन्द अवधि सिलगढ़ीको हिलकार्ट रोड, झङ्कार मोड़ क्षेत्रमा तनाउ उत्पन्न भयो। सोमवार विश्व हिन्दू परिषदका केही सदस्यहरूले एउटा निजी ब्याङ्कको शटर तानेर जबरजस्ती ब्याङ्क बन्द गर्ने प्रयास गरे। तर त्यसै बेला त्यहाँ उपस्थित पुलिसको टोलीले तिनीहरूलाई रोक्न खोज्दा धक्कामुक्की र भनावैरी आरम्भ भयो।
ब्याङ्क खुल्ला देखेर बन्द समर्थकहरू आक्रोशित भए। तिनीहरूले पहिले ब्याङ्कका कर्मचारीहरूसित कुराकानी गर्न खोजे तर पछि शटर झार्नका लागि अघि बढ़े। त्यसै बेला पुलिसले तत्काल हस्तक्षेप गरेर स्थिति नियन्त्रणमा ल्यायो। यस घटनाका कारण केही समयका लागि हिलकार्ट रोडमा वाहनहरूको आवागमन प्रभावित भयो। तर थप पुलिस बल परिचालन गरी स्थिति सामान्य बनाइयो। पुलिस सूत्रअनुसार स्थिति अझ तनाउपूर्ण बन्न नदिन सतर्कतामूलक कदमहरू चालिए।
बन्दलाई समर्थन गर्दै शहरका विभिन्न भागमा बन्द समर्थकहरूले ऱ्याली निकाले। बिहानैदेखि शहरका धेरै ठाउँमा पटकपटक पिकेटिङ गरियो। विशेष गरेर पसलहरू खुल्ला राखिएको विषयमा केही स्थानमा क्षणिक तनाउको स्थिति सिर्जना भयो। त्यसै गरी बन्द समर्थकहरूले आज ठूलो ऱ्यालीको आयोजना गरे। जुन विधान रोड, सेभोक रोड हुँदै हिलकार्ट रोडसम्म पुग्यो। ऱ्यालीका क्रममा बन्द समर्थकहरूले व्यापारीहरूलाई 24 घण्टाका लागि पसल बन्द गर्न अनुरोध गरे। अर्कातिर अप्रिय घटना हुन नदिन सिलगढ़ी मेट्रोपोलिटन पुलिसले चोकचोकमा व्यापक पुलिस बल तैनाथ गरेको छ।
