उत्तर बङ्गाल मेडिकल कलेज औ अस्पताल परिसर फोहोरले ढाकिएको छ। विभिन्न विभागहरूको पछिल्तिरको भागमा प्लास्टिकले बेह्रिएको फोहोर जम्मा भएको देख्न सकिन्छ। यसको कारण दुर्गन्ध फैलिरहेको छ साथै प्रदूषणसमेत बढ्दै गइरहेको छ। तर ती फोहोरहरू नियमित रूपमा किन सफा गरिँदैन भन्ने विषयबारे रोगीका आफन्तहरूले प्रश्न उठाउन थालेका छन्।
यस विषयमा उत्तर बङ्गाल मेडिकल कलेज औ अस्पतालका सुपरिण्टेण्डेण्ट डा. सञ्जय मल्लिकले भने, फोहोर व्यवस्थापनमा हामीले लामो समयदेखि समस्या झेलिरहेका छौँ। तथापि फोहोर नियमित रूपमा हटाइन्छ। अहिले थुप्रिएको सबै फोहोर जैविक नै हो। ब्लड ब्याङ्कको पछिल्तिर भाग, सुपर स्पेशियालिटी ब्लकको वरिपरि फोहोरको थुप्रो लागेको छ। त्यहाँ कालो र निलो प्लास्टिकले बेह्रिएको फोहोरभित्र खाना खोज्दै पाल्तु जनावरहरू दिनभरि घुमिरहेका देखिन्छन्। मेडिकल कलेजको फोहोर व्यवस्थापन समाधान गर्न सिलगढ़ी महकुमा परिषदले फोहोर प्रशोधन युनिट निर्माण गरेको छ। तर त्यो पनि प्रभावकारी रूपमा काम गरिरहेको छैन भन्ने गुनासो छ।
सिलगढ़ी चम्पासारी निवासी राधारानी सरकार आफ्ना छोराको उपचारका लागि मेडिकल कलेजमा आएकी थिइन्। तिनले भनिन्, यसअघि मेडिकल कलेज सफा देखिन्थ्यो। तर यसपालि यति धेरै फोहोर किन थुप्रिएको छ त्यसबारे थाहा छैन। यति फोहोरबाट रोगीहरूमा अन्य रोग फैलिन सक्छ। स्वास्थ्य संस्थामा यति धेरै फोहोर हुनु अकल्पनीय विषय हो। विधाननगरबाट उपचारका लागि मेडिकल कलेज आएका तुफान राहा नामक व्यक्ति चकित भएका छन्। तिनले भने, मेडिकल कलेज जस्तो स्थानमा सरसफाईलाई उच्च प्राथमिकता दिनुपर्छ।
मेडिकल कलेजमा सफाईकर्मीको अभाव रहेको बताइन्छ। सिलगढ़ी-जलपाइगढ़ी विकास प्राधिकरणले वर्षभरि मेडिकल कलेजको सरसफाईमा सहयोग गर्दै आइरहेको छ। तर पनि दैनिक रूपमा पूरै सरसफाई हुन सकेको छैन। सिलगढ़ी नगर निगमका मेयर गौतम देवले केही विशेष अवसरहरूमा सफाईकर्मी पठाउने गरेका छन्। तर त्यो पनि नियमित रूपमा हुँदैन। यसको कारण वर्षको अधिकांश समय मेडिकल कलेज फोहोरले ढाकिएको हुन्छ।
