जलपाईगुडी (न्युज एशिया) डुअर्समा हात्तीको आक्रमणबाट एक जनाको मृत्यु भएको छ भने एक जना घाइते भएका छन् । यसपटक हात्तीले एक पुरुषको हत्या गरेको छ भने श्रीमती पनि गम्भीर घाइते भएका छन् । मृत्यु हुनेमा बब्लु उराँव (५९) रहेको छ भने घाइते महिलाको सनाखत लछो उराँउ (४४) रहेको छ ।यो घटना डोअर्सको मेटली ब्लकको उत्तरी धुपझोरा मूर्ति वन गाउँ क्षेत्रमा भएको बताइएको छ ।
हात्तीले घरको पछाडीको बार भत्काएर बब्लुलाई सोण्डले घरबाट बाहिर निकालेको थियो । घरको बार भाँच्दा घरको एक भाग भत्किँदा ठूलो दाउराले किचेर श्रीमती गम्भीर घाइते भएकी छन् । यसैबीच हात्तीले घरबाट बबुल निकालेर कुल्कायो ।स्थानीयवासीले यो कुरा बुझेर कराउन थालेपछि हात्ती फेरि जंगलतिर पस्यो ।
खबर पाएर राति नै मेटली प्रहरी चौकीबाट प्रहरी र खुनिया रेन्जका वनकर्मी घटनास्थलमा पुगेका थिए । यसैबीच बब्लु र उनकी श्रीमतीलाई चाल्सा तुर्मसी ग्रामीण अस्पताल पुर्याउँदा ड्युटीमा रहेका चिकित्सकले बब्लुलाई मृत घोषणा गरेका थिए । यता उनकी श्रीमतीको अवस्था गम्भिर रहेको र उनलाई माल सुपर स्पेशलिटी अस्पतालमा लगिएको छ । मृतकका परिवारले सरकारी नियमअनुसार क्षतिपूर्ति पाउने वन विभाग स्रोतले जनाएको छ ।
