सिलगढ़ी अनि वरिपरि क्षेत्रहरूमा दिन प्रतिदिन मोबाइल चोरीको घटना बढ्दै गइरहेको छ। चाहे भक्तिनगर पुलिस थाना होस्, प्रधाननगर पुलिस थाना, सिलगढ़ी पुलिस थाना वा एनजेपी पुलिस थाना सबै क्षेत्रका पुलिस अधिकारीहरू मोबाइल चोरीका घटनाहरूले चिन्तित छन्। प्रत्येक दिन पुलिस अधिकारीहरूलाई मानिसहरूको गुनासो प्राप्त भइरहेको छ। पुलिसले मोबाइल तथा मोबाइल चोरहरूलाई पक्रेर वास्तविक मालिकलाई फर्काउने प्रयास पनि गरिरहेको छ। विगत केही दिनदेखि एनजेपी थाना क्षेत्रमा मोबाइल चोरीका घटना ह्वात्तै बढ़ेको छ। पुलिस थानामा प्राप्त गुनासोहरू अनुसार, कोही व्यक्तिको घरैबाट मोबाइल हराएको छ त कसैको बजारमा किनमेल गर्दा वा कसैको पार्किङ गर्दा, कसैको मोबाइल त्यस बेलामा हराएको छ जब तिनी कुनै महिलालाई सहयोग गर्दै थिए भने कसैको मोबाइल पसलको काउण्टरमा राख्दा हराएको छ। एनजेपी पुलिसलाई हालै मोबाइल चोरीको नालिश गर्ने व्यक्तिहरूले बताएअनुसार मोबाइल चोरीमा महिलाहरू नै संलग्न छन्। धेरै नालिशहरूमा महिलाहरूको नाम नै अगाड़ि आएको थियो। त्यसपछि एनजेपी पुलिसले प्राप्त गुनासोका आधारमा मोबाइल चोरीका घटनाहरूमा महिलाहरूमाथि विशेष रूपले निगरानी गर्न थालेको छ। पीड़ितहरूले आफ्नो नालिशमा मोबाइल चोरी गर्ने महिलाहरू बाहिरी क्षेत्रका हुन सक्ने पनि बताए। ती महिलाहरू समूहमा हिँड्छन् र कुनै पनि पसलमा पस्छन्। कोही महिलाहरू नानी बोकेर आउँछन् भने कोही महिलाहरू भीख माग्ने बहानामा घरभित्र पस्छन्। गुनासो गर्ने व्यक्तिहरूबाट प्राप्त शङ्कास्पद महिलाहरूको हुलिया र व्यवहारलाई आधार मानेर आफ्ना गुप्तचरहरूको सहयोगमा पुलिसले निगरानी गर्न थालेको छ।
सिलगढ़ीको फूलबारी, डाबग्राम क्षेत्रमा चोरीमा संलग्न महिलाहरूको गिरोहबारे पुलिसलाई पहिल्यै जानकारी प्राप्त भएको थियो। ती महिलाहरूको सम्बन्ध दिनाहाटा, कूचबिहारमा गरिएको गरगहना चोरी तथा अन्य चोरीका घटनासित जोड़िएको थियो। केही दिनअघि कूचबिहार पुलिसले त्यहाँबाट केही महिलाहरूलाई पक्राउसमेत गरेको थियो। अन्तत पुलिसको प्रयास सफल भएको छ। गुप्तचरको सूचनाका आधारमा एनजेपी पुलिसले ती महिलाहरूलाई त्यति बेला पक्राउ गर्यो जब तिनीहरू चोरीका मोबाइल लुकेर बेच्ने योजनामा यताउता घुमिरहेका थिए। महिला पुलिसको सहयोगमा पुलिसले धेरै महिलाहरूलाई एकैसाथ नियन्त्रणमा लियो। पक्राउ परेका महिलाहरूसित ससाना शिशुहरू पनि थिए।
पुलिसले तिनीहरूलाई एनजेपी थाना ल्याएर सोधपुछ गर्दा सबै महिलाहरू मध्य प्रदेशबाट आएका र यहाँ चोरीको काममा संलग्न रहेका थाहा लाग्यो। पुलिसले तिनीहरूबाट धेरै महँगा चोरीका मोबाइलहरू फेला पार्यो्। प्रारम्भिक सोधपुछपछि एनजेपी पुलिसले समूहका सबै महिलाहरूलाई न्यायालयमा प्रस्तुत गरेको छ। एनजेपी पुलिस अधिकारीले जानकारी गराएअनुसार यी महिलाहरूको समूह निकै सक्रिय छ। तिनीहरूसित अन्य धेरै महिलाहरू पनि संलग्न हुन सक्ने सम्भावना छ। पुलिसले साधारण मानिसहरूलाई सतर्क रहन आग्रह गर्दै मोबाइल वा अन्य बहुमूल्य सामग्रीहरूको सुरक्षामा ध्यान दिने सुझाउ दिएको छ। साथै कुनै अपरिचित महिलालाई घरभित्र पस्न नदिने पनि सुझाउ दिएको छ। भीख माग्ने बहानामा चोरी गर्ने सम्भावना हुँदा सतर्क रहने बताइएको छ। सिलगढ़ी मेट्रोपोलिटन पुलिसले मोबाइल चोरी गर्ने समूहको भण्डाफोर गर्ने तयारी गरिरहेको छ।
