सेप्टेम्बर ७ मा रिलिज भएयता अभिनेता शाहरुख खानको फिल्म ‘जवान’ ले विश्वभर बक्स अफिसमा राज गरिरहेको छ । फिल्म ट्रेड एनालिस्ट मनोबाला विजयबलनका अनुसार फिल्मले बक्स अफिसमा छैटौं दिन विश्वभर ६०० करोडभन्दा बढीको कमाई गरेको छ ।
एसआरकेको रेड चिलीज इन्टरटेनमेन्टले निर्माण गरेको यो फिल्ममा दक्षिण अभिनेता एट्लीले निर्देशन गरेका हुन् भने नयनथारा, विजय सेतुपति, सान्या मल्होत्रा र रिद्धि डोग्रा पनि मुख्य भूमिकामा छन्।
फिल्मले आधिकारिक रिलिजको मिति अघि नै इन्टरनेटका साथै टिकट काउन्टरमा पनि आगो लगाएको थियो । टिकट बुकिङले विश्वभर विगतका सबै रेकर्ड तोडेको छ ।
रिलिजको छैटौं दिनमा भारतमा १० लाखभन्दा बढी टिकट बिक्री भएको स्रोतले जनाएको छ । फिल्म हिन्दी, तमिल र तेलुगु तीन भाषामा रिलिज भएको थियो । अनिरुद्ध रविचन्द्रले जवानलाई संगीत दिएका थिए ।
