जलपाइगुडीको क्रान्ति ब्लकअन्तर्गत च्याङमारी क्षेत्रमा दिनको उज्यालोमै गाउँभित्र चराको शिकार भइरहेको घटना सार्वजनिक भएको छ। सोमवार दिउँसोतिर यो घटना बाहिरिएपछि गाउँवासी र पर्यावरणप्रेमीहरूबीच आक्रोश फैलिएको छ। स्थानीय सूत्रअनुसार सोमवार दिउँसो केही युवाहरूले च्याङमारी गाउँको टिस्टा नदीसित जोड़िएको एउटा जलाशयमा चराको शिकार गरिरहेका थिए। बाटो हिँड्ने मानिस र स्थानीय वासिन्दाको नजरमा विषय परेपछि क्षेत्रभरि तनाउको अवस्था सिर्जना भयो।
स्थिति प्रतिकूल बन्दै गइरहेको अनुभव गरेपछि ती युवाहरू क्षेत्र छोड़ेर भागे। लामो समयदेखि क्रान्ति ब्लकको आपलचाँद रेञ्जअन्तर्गत विभिन्न क्षेत्रमा चराको शिकारको प्रवृत्ति बढ्दै गएको स्थानीय वासिन्दाहरूको आरोप छ। तिनीहरूको दाबी छ, प्रायः चराका शिकार गर्नेहरू गाउँका गल्ली–गल्लीमा घुमिरहन्छन्। तीर र अन्य उपकरण प्रयोग गरी चराको शिकार गरिन्छ। कहिलेकाहीँ त घरभित्र ढुङ्गा प्रहार गर्ने घटनासमेत भएको आरोप छ।
क्रान्ति ब्लकका मालहाटी, चौरङ्गी, गङ्गादेवी, तालतला, च्याङमारीलगायत विभिन्न गाउँमा घुम्दै यी शिकारी समूहले चराको शिकार गरिरहे पनि वन विभागको तर्फबाट खासै प्रभावकारी कदम नचालिएको गुनासो उठेको छ। यस सन्दर्भमा पर्यावरणप्रेमी अनिरवाण मजुमदारले भने, लेसर ह्विस्लिङ डक, बकुल्ला, बसन्तबौरी, पानकौड़ी, डाहुक, माछाराङ्गा, घुघु, शालिक, तितिरलगायत थुप्रै प्रजातिका चराको शिकार भइरहेको देखिएको छ। यी सबै रोक्न वन विभागले अझ सक्रिय भूमिका निर्वाह गर्नु आवश्यक छ। मानिसहरूमा अझै पनि चेतनाको कमी रहेको छ, यो घटना त्यसकै प्रमाण हो। आपलचाँद रेञ्जका रेञ्जर नवाङ्कुर घोषले भने, यस्ता घटना रोक्न वन विभागको तर्फबाट आवश्यक कदम चालिनेछ।
