सरकारी आँकड़ाअनुसार दार्जीलिङमा होमस्टेको सङ्ख्या चार सय भन्दा बढ़ी छ। सम्पूर्ण पहाड़ी क्षेत्रमा यो सङ्ख्या तीन हजार पार गर्नेछ। तर सरकारी रेकर्डमा दर्ता भएका होमस्टेहरूको सङ्ख्या अत्यन्तै कम्ती छ। यसको कारणले गर्दा यहाँका होमस्टेहरू सरकारी सुविधाबाट वञ्चित भइरहेका छन्। यस्तै असन्तोष पर्यटन मन्त्रालयका सहायक निर्देशक (कोलकाता) ज्योतिर्मय विश्वासको भनाइमा झल्किएको छ। अहिले अधिकांश होमस्टेहरू लिजको माध्यमद्वारा सञ्चालन भइरहेका छन्।
दर्तामा समस्या नआवोस् भन्ने कुरा प्रत्यक्ष उल्लेख नगरे पनि तिनले स्वामीत्वको महत्त्वमाथि जोड दिँदै समस्याहरू आइपर्न सक्ने भनेर पहाड़का मानिसहरूलाई चेताउनी दिएका छन्। पर्यटन मन्त्रालयको सहयोगमा इष्टर्न हिमालय ट्राभल्स एण्ड टुर अपरेटर एशोसिएशन (एटुवा) र एक्सपेरियन्स इनक्रेडिबल जर्नीले सोमवार सिटोङमा होमस्टे सम्बन्धी एउटा तालिम शिविरको आयोजना गरेका थिए। सिटोङको डायरी गाउँमा आयोजना गरिएको यस शिविरमा प्रमुख वक्ताको रूपमा पर्यटन मन्त्रालयका सहायक निर्देशक उपस्थित थिए।
होमस्टेको चरित्र परिवर्तनबारे एटुवाका महासचिव देवाशीष चक्रवर्ती, पर्यटन मन्त्रालयका सिनियर टुरिष्ट इन्फर्मेशन अफिसर सञ्जीव देवचौधुरी, सिटोङ इको ट्राभलर्स वेलफेयर सोसाइटीका अध्यक्ष सन्ध्या आचार्य लेप्चा आदिले पनि चिन्ता व्यक्त गरे। ज्योतिर्मयले भने, स्वतन्त्रता कायम राख्दै होमस्टे सञ्चालन गर्नुहोस्। दर्ता गर्नुहोस्। दर्ता गर्दा यसलाई पर्यटन मन्त्रालयको पोर्टलमा स्थान मिल्नेछ। यसो गर्दा अष्ट्रेलियाको सिडनीबाट पनि पर्यटकले सिटोङको होमस्टेबारे जानकारी प्राप्त गर्न सक्नेछन्।
