हात्तीको आक्रमणमा दुई युवकको मृत्यु

राजगञ्ज ब्लकको मानतादरी ग्राम पञ्चायतअन्तर्गत टाकीमारी गाउँको धाड़िया नदी किनारमा हात्तीको आक्रमणमा दुई युवकको मृत्यु भएको छ। बिहीवार बिहान स्थानीय कार्यक्रमबाट घर फर्किरहेका छजना व्यक्तिहरूको जङ्गली हात्तीसित जम्काभेट हुँदा यस्तो घटना भएको हो। घटनामा चारजना भाग्न सफल भए पनि दुई युवक तुषार दास र नारायण दास त्यति भाग्यमानी थिएनन्। हात्तीको आक्रमणमा यी दुईको घटनास्थलमै मृत्यु भयो। यस घटनाले जनआक्रोश बढ़ाएको छ। स्थानीयहरूले वन विभागले समयमै सावधानी अपनाउन नसकेको आरोप लगाएका छन्। उतिहरूले केही दिनअघि मात्र त्यही क्षेत्रमा हात्तीको आक्रमणमा राजेश उराँव नामक एक व्यक्तिको पनि ज्यान गएको बताए।
जानकारी पाएपछि भोरेर आलो पुलिस चौकी र गजलडोबा चौकीका पुलिस घटनास्थल पुग्यो। त्यसपछि वन विभागका अधिकारीहरू पनि आए। शवहरू उद्धार गरी पोस्टमर्टमको लागि पठाइएको छ।
बैकुण्ठपुर वन डिभिजनका एडीएफओ राजीव लामाले घटनाप्रति दुःख व्यक्त गरे। तिनले परिवार र स्थानीयहरूसित भेटघाट गरेका बताइएको छ। स्थानीय मानिसहरूले क्विक रेसपोन्स टीम र बार लगाउने माग गरेका छन्। भोलि गाउँलेहरूसित छलफल गर्ने कार्यक्रम छ र मृत युवकका परिवारहरूलाई सरकारी सहयोग प्रदान गरिनेछ।