सिलगढीको माटिगारामा एक नाबालिगको हत्याको विरोधमा विश्व हिन्दू परिषदद्वारा आह्वान गरिएको १२ घण्टा बन्दको सिलगढीमा बिहान मिश्रित प्रतिक्रिया आएको छ। बिहानैदेखि पसल बन्द भए पनि सवारी आवागमन भने सामान्य रहेको छ। यसै क्रममा फुलेश्वरी बजारलगायत धेरै बजार सुचारु भएपनि केहीबेरमा बन्द समर्थकले पसल बन्द गराए। जसका कारण दिनभरको रोजगारी ठप्प भएको व्यवसायी बताउँछन्। धेरै ठाउँमा यात्रुलाई ओसारपसार गरेर टोटो तोडफोड गरिएको थियो। जसका कारण सर्वसाधारण यात्रुले सास्ती खेप्नु परेको छ। बन्दका कारण सिलगढीका सडक सामान्य दिनको तुलनामा सुनसान देखिएका छन्। अर्कोतर्फ, सिलगढीका मेयर गौतम देव र पापिया घोष बन्दको विरोधमा सडकमा उत्रिए। बन्दका कारण दैनिक ज्यालादारी गर्ने मजदुर तथा श्रमिकलाई समस्या परेको भन्दै मेयरले यसलाई रोक्न नहुने बताए।
