पार्टीमा गहिरिँदो संकट समाधानका लागि अनौपचारिक संवाद गर्न एक साताका लागि नेकपा स्थायी कमिटी बैठक स्थगित भए पनि यस अवधिमा खासै प्रगति हुन सकेन । आइतबार (२१) मंसिरमा बसेको स्थायी कमिटी बैठक दुवै अध्यक्षका प्रस्ताव र पत्र अध्ययन र अनौपचारिक संवादका लागि मंसिर २८ अर्थात् आइतबारसम्मका लागि स्थगित भएको थियो ।
२१ मंसिरको बैठक एक साता स्थगनपछि प्रवक्ता नारायणकाजी श्रेष्ठले भनेका थिए, ‘यो अवधिमा स्थायी कमिटीका नेताहरूलाई दुवै अध्यक्षका प्रस्ताव र पत्र अध्ययन गर्न भनिएको छ, सहमतिका लागि अनौपचारिक रूपमा कोसिस जारी रहनेछ ।’ तर, यो एक सातामा सहमति जुटाउने सघन संवादमा भन्दा नेताहरु एकअर्का समूहविरुद्ध रणनीति बनाउने तयारीमा जुटेका छन् ।
गएको आइतबारदेखि शनिबारसम्म प्रधानमन्त्री एवं अध्यक्ष केपी शर्मा ओली र अर्का अध्यक्ष पुष्पकमल दाहालबीच एकपटक अनौपचारिक संवाद भए पनि विवाद समाधानका लागि शीर्ष तहमा अरु कुनै भेट भएका छैनन् । बरु, यसबीचमा समूहगत छलफल र भेला भएका छन् ।
पार्टी नेताहरुले एक साताको समयमा केही प्रगति नभएको बताएका छन् । स्थायी कमिटी सदस्य सुवास नेम्वाङ भन्छन्, ‘नेताहरुबीच भेटघाट कुराकानी भएका छन् । आज शंकर पोखरेल र प्रचण्ड कमरेडको भेट भयो । प्रधानमन्त्री र प्रचण्ड कमरेडबीचमा टेलिफोन संवाद नियमित रुपमा भइराखेको छ । भोलि बिहान प्रचण्ड कमरेडले मलाई भेट्न बोलाउनु भएको छ । बिहान जान्छु । यसरी कुराकानी भइराखेको छ तर अहिलेसम्म देखिने ढंगको परिणाम आएको छैन ।’
